|
|
მზე, წვიმა და ქარი - ხობიხობის მე-4 საერთაშორისო ფესტივალი წარმატებით დასრულდა
2003 წელს ბიზნესმენმა, პარლამენტარმა გოდერძი ბუკიამ ერთ კარ საქმეს ჩაუყარა საფუძველი, დაარსა “მეგრული სიმღერის, ხობის საერთაშორისო ფესტივალი”, რომელსაც ყოველ მეორე წელს მასპინძლობენ ხობელები და რომლის სტუმართა სია ხანდახან 800 ადამიანსაც აღწევდა (წინა წლებში).
გოდერძი ბუკიას ფონდის თაოსნობითვე, ამ ფესტივალის ფარგლებში გამოიცა ოთხ ტომიანი მონოგრაფია “ქართული სიმღერის ოსტატები”, “ქართული ხალხური მუსიკის” სანოტო კრებულის სამტომეული, “მეგრული პოეზიის კრებული”, აუდიო-პროდუქცია, გაიხსნა ძუკუ ლოლუას სახელობის ქართული ხალხური სიმღერის მუზეუმი, ვილენ მარდალეიშვილის ავტორობით ალექსანდრე (ბუთხუზ) ბასილაიასადმი მიძღვნილი საიუბილეო წიგნი “იცოცხლე მაესტრო” (რჩეული სიმღერების დისკით), მეგრულ-აფხაზური სიმღერების რჩეული კომპატქ-დისკზე და უამრავზე-უამრავი სხვა გამოცემები, რომლებიც სხვა თუ არაფერი ისტორიას შეუნახავს იმას, რა სიმდიდრეც ჩვენ გაგვაჩნია.
რაც შეეხება თავად ფესტივალს - მაღალ დონეზე ორგანიზებული ღონისძიება 19 სექტემბერს დაიწყო ხობში, სადაც დილიდან გადაუღებლად წვიმდა, მაგრამ დღის მეორე ნახევარში გამოიდარა და მზემ სტუმრები უჩვეულო სითბოთი გაახარა, - სწორედ იმ საღამოს ხობის რაიონის სოფელ ხეთაში კონცერტი იმართებოდა, სადაც უწმინდესი და უნეტარესი ესწრებოდა, რომელსაც უნდა აღინიშნოს, რომ მთელი კონცერტის მსვლელობას, ღია ცის ქვეშ ბოლომდე დაესწრო, მანმადე კი, გზად ზუგდიდი-ცაიშის გზასაყართან ორსაათიანი ლოდინით დაუღალავი (!) ხალხი დალოცა.
ჩამოთვლა იმ კოლექტივებისა, რომლებმაც აღნიშნულ კონცერტში მიიღეს მონაწილეობა შორს წაგვიყვანდა, მაგრამ უდაოდ აღსანიშნავია ანსამბლი “რუსთავი” რომელმაც დახურა ხეთის ღია საკონცერტო სცენაზე ის საღამო, სტუმარი თურქეთიდან ბაიარ შაჰინი, რომელსაც აპლოდისმენტები არ დაკლებია მაყურებლისგან და უნიკალური ტრიო - გომარ სიხარულიძე, თემურ ქევხიშვილი და ანზორ ერქომაიშვილი, რომლებმაც შეასრულეს კომპოზიტორ გომარ სიხარულიძის “ჩქიმი ჯიმა ძუკუ ლოლუა” დაწერილი ლოტბარ კიწი გეეგჭკორის ლექსზე.
ანზორ ერქომაიშვილი, მარიკა კვალიაშვილი, ვაჟა აზარაშვილი, ოთარ ტატიშვილი, ნუნუ დუღაშვილი, რუსუდან ხორავა - ვის არ ნახავდით, ვისთან უშუალო შეხების საშუალება არ მოგეცემოდათ იმ დღეებში, დიდ ხალთან, დიდ ადამიანებთან, პიროვნებებთან რომლებმაც თავისი სიტყვა უკვე თქვეს ქართული კულტურის განვითარებაში.
ერთი სანახავი იყო მეორე დღის კონცერტი ხობის ცენტრში, რომელიც გენა მამედოვის, უნიკალური სასცენო აპარატურის წყალობით უმაღლეს დონეზე ჩატარდა და კიდევ ერთხელ ვიმეორებთ - მიუხედავად თავსხმა წვიმისა, ხალხს ფეხი არ მოუცვლია ადგილიდან, რადგან არც ისე ხშირად აქვს ხობში, უბრალო ადამიანს ბედნიერება იმისა, რომ სცენაზე იხილოს ბესო კალანდაძე, მანანა თოდაძე და თანამედროვე ესტრადის ვარსკვლავები - დუეტი “ჯორჯია”, რუსეთში გადახვეწილი დათო ხუჯაძე და სხვანი და სხვანი.
|
